Bed ar plant Ur bed da zizoleiñ e chom bed ar plant. Da zizoleiñ pe da addizoleiñ e gwirionez, alies-mat. Ret eo da gentañ adkavout ar seurtoù plant a veze gounezet gwechall hag a oa diouzh hor bro da vat evel ar gwinizh-du pe ar yell. Deskiñ tennañ hor mad eus ar pezh a oa deuet betek ennomp gant ar rummadoù kent.

Diwar ar sichenn-se e c’hallimp mont war-raok. Kompren ar plant a ranker ober. Sellet outo evel ouzh boudoù bev hag a zo pell a vezañ boudoù gouzañvat hepken.

Ha digeriñ hentoù nevez. An aeroponiezh zo unan anezho. Lakaat kreskiñ plant ha legumaj e kêr a c’heller hag a rankimp ober. Ret e vo mont war an tu-se. Ha kavout doareoù all da vagañ an dud. Ha klevet hoc’h eus komz eus ar spirulin? Sed aze sianobakteri hag a c’hallfe en em gavout aliesoc’h-aliesañ en hon asiedoù en dazont.

Un tamm eus ar cheñchamant kevredigezh zo da gas da benn e Breizh zo aze : tremen eus ar sevel chatal askoridik d’ar produiñ boued nevezus. Peadra hon eus e Breizh evit bezañ evit an dae-se.