Tommadur lêr mab-den.

Tro ho peus bet marteze da glevet kaoz eus diac’hinad Fermi, diwar anv ar fizikour Enrico Fermi (1901–1954). Boulc’het en doa ur preder, a-gevret gant skiantourien all, diwar-benn an diouer a zarempred o deus an dud gant boudoù all daoust d’an hollved divuzul ha kozh-Noe en-dro dimp : perak ’ta emaomp digenvez ? Puilh eo an hentoù enklask bet difraostet hag a vez kendalc’het da duriañ abaoe gant rummadoù skiantourien nevez. Unan eus ar c’hinnigoù graet eo e vefe techet ar sevenadurioù da vont war hent an emzistruj. Unan eus an abegoù a vefe kresk ar galloud teknologel a ya kalz primoc’h eget ar skiant-vat. Da lavaret eo, plantañ tan e-barzh an ti pa ’z eur bac’het ennañ.

Ur mennozh damheñvel a vez skignet er mare-mañ gant an neuroskiantour Idriss Aberkane, gant ur sell kalz frealzusoc’h avat. Ul levr eo an natur hag e-lec’h e lenn emañ mab-den o teviñ anezhañ. Aze emañ kalonenn dislavar hor mod bevañ : kreskiñ ha kreskiñ c’hoazh a fell dimp ober diwar danvezioù annevezadus. Ha padal emañ an dud en ur bed kalz padusoc’h, an natur. Anavezout, intent ha doujañ gwelloc’h hon endro naturel a zegaso mennozhioù, binvioù ha doareoù bevañ nevez. Diskoulmoù dic’hortoz ivez. Ken tost hag e porzhioù hon atantoù : nevez e oa bet kavet e c’helled talañ ouzh astenn c’hwiliorezed Azia gant harp... yer du Gentieg. Ur spesad yer kozh eus bro Roazhon, war-nes mont da get.

An Douar hag he natur a zeuio a-benn da gavout un doare forzh penaos. Hepdomp. Gwashoc’h zo bet bevet gant ar blanedenn hag emañ o treiñ bepred. Bremañ eo cheñch... mar fell da vab-den padout.